НООРУЗ 2025: ОШ ШААРЫНДА МАЙРАМ ЧОҢ САЛТАНАТ МЕНЕН БЕЛГИЛЕНДИ

Нооруз шаңы быйыл Ош шаарында мамлекеттик деңгээлде белгиленип, өлкө башчы Садыр Жапаровдун катышуусунда өттү.

Ага ылайык шаардын борбордук аянтында боз үйлөр тигилип, маданият, маалымат спорт жана жаштар саясаты министрлиги, Ош шаардык маданият башкармалыгы тарабынан ноорузду даңазалоо максатында атайын концерттик программа уюштурулду.

Борбордук аянтта өтүп жаткан салтанатка КР Президенти Садыр Жапаров катышып, ал Кыргызстандыктарды көктөм майрамы менен куттуктады. Иш-чаранын жүрүшүндө миңге жакын бийчилерден жана ырчылардан, театр артистеринен турган топ жаз майрамын сахналаштырып, шаар тургундарына жагымдуу маанай тартуулашты.

Иш-чарага Ош мамлекеттик педагогикалык университетинин ректору Бекмурза Зулуев баштаган окутуучулар жамааты да күбө болду. Аянттын сол тарабында ар улуттан куралган 13 диаспоранын өкүлдөрүнүн катышуусунда жарманке өткөрүлдү. Катарда окуу жайдын жамааты да көргөзмөгө активдүү катышып, мында алар казак, жапон элдеринин маданиятын чагылдырышты.

Ошондой эле улуттук тамак-аштар, кол өнөрчүлөрдүн буюмдары жана улуттук кийимдердин жарманкелери көрсөтүлүп, кыргыз улуттук оюндарынын түрлөрү боюнча мелдештер өткөрүлдү.