Окуу жайдын музыкалык-педагогикалык факультетинде ата-энелер менен жолугушуу уюштурулду

Бүгүн Ош мамлекеттик педагогикалык университетинин музыкалык-педагогикалык факультетинде студенттердин ата-энелери менен жолугушуу өткөрүлдү.

Иш-чара “Ата-эне – баланын зор тиреги” аталышында өтүп, ага университеттин ректору Бекмурза Зулуев, аталган факультеттин деканы Кундуз Миңбаева баштаган окутуучулар, студенттер жана ата-энелер катышты. Саамалык келечектеги компотенттүү адистерди даярдоодо ата-энелер менен тыгыз байланышта болуу максатын көздөйт.

Жыйында студенттердин быйылкы жетишкендиктери, окууда жана спорттук, маданий иш чаралардагы активдүүлүгү жана окуу жайдагы соңку жаңылыктар боюнча түшүнүк берилди. Ошондой эле катышуучуларга факультет тууралуу жалпы маалымат берилип, университетте студентттердин татыктуу билим алуусуна түзүлгөн шарттар жана мүмкүнчүлүктөр, негизги билим берүү программасы (НББП) боюнча кеңири маалыматтар айтылды.

Бул менен бирге “Кербен” фольклордук ансамбли жана таланттуу студенттер тарабынан жаштардын маданий чыгармачылыгын көрсөткөн концерттик программа тартууланып, соңунда уюштуруу тобу тарабынан мыкты окуган, коомдук иштерге жигердүү катышкан, үлгүлүү студенттердин ата-энелерине ыраазычылык каттар тапшырылды.