БИРИМДИКТИ БЕКЕМДЕГЕН БИЛИМ ТАЙМАШ

Ош мамлекеттик педагогикалык университетинде орто кесиптик билим берүүчү окуу жайлар арасында “Билим” кубогу өткөрүлдү.

Саамалык окуу жайдын 100 жылдыгына жана Кыргыз Республикасынын Президентинин 2024-жылдын 18-декабрындагы №369 жарлыгына ылайык “Улуттук дем – дүйнөлүк бийиктик” уңгужолунун негизинде университеттин Жаштар комитети тарабынан уюштурулду.

Ага жалпы 10 орто окуу жайдын студенттери катышып, мында оюнчулар “Улуттук баалуулуктар”, “Дүйнө тааным”, “Кыргыз наркы”, “Макал-лакаптар”, “Билим берүү” багыттары боюнча түрдүү суроолорго жооп берип, өз ой-жүгүртүүлөрүн жана билим деңгээлдерин көрсөтүштү.

Жыйынтыгында, калыстардын чечими менен эң көп упай топтогон ОшМПУнун колледжинин студенти Асема Кармышакова таймаштын баш байгесин жеңип, “Билим” кубогуна ээ болду. Ал эми 2-орун Ош аймактык медициналык колледжинин студенти Айжан Жеенбаевага, 3-орун Ош айыл чарба техникумунун студенти Нурдөөлөт Автандил уулуна ыйгарылды. Жеңүүчүлөргө атайын дипломдор, китептер, символикалык статуэткалар жана баалуу белектер тапшырылды.

Аталган акыл таймаш студенттердин билим деңгээлин жогорулатуу, китеп окуу маданиятын жайылтуу, терс таасирлерден алыс болууга шыктандыруу жана орто окуу жайлардын ортосундагы ынтымакты чыңдоо максатын көздөйт. Мындай иш-чаралар жаштардын ой өрүшүн байытып, улуттук нарк-насилди терең билген интеллектуалдуу муунду тарбиялоого өбөлгө түзөт.