БӨБӨКТАЙ БАЛДАР БАКЧАСЫ АЛГАЧКЫ БҮТҮРҮҮЧҮЛӨРҮН УЯДАН УЧУРДУ

Бүгүн, Ош мамлекеттик педагогикалык университетинин “Бөбөктай” мектепке чейинки билим берүү мекемесинде “Кош бол, бакча” аттуу даярдоо тайпасынын бүтүрүү кечеси болуп өттү.

Иш чарага окуу жайдын жана бала бакчанын жетекчилиги, окутуучулар жана ата-энелер катышып, бүтүрүүчү тайпанын чакан концерттик программасына күбө болушту.

Мында жаш жаткинчектер хор ырдашып, улуттук оюндарды ойношуп, тамгаларды айтып, ата-энелери менен бийлешип, кызыктуу оюндарды тартуулашты. Кеченин соңунда ата-энелер сөз сүйлөшүп, балдарынын бакчаны аяктап жатканы ары кубанычтуу, ары толкунданткан учур экенин белгилешип, бакчанын жамаатына ыраазычылыктарын билдиришти.

“Бөбөктай” балдар бакчасы 2024-жылдын 26-августунан өз ишмердүүлүгүн баштаган. Учурда бала бакчада 200гө жакын бала тарбияланып жатат.