АКМУЛЛА УНИВЕРСИТЕТИНИН РЕКТОРУ САЛАВАТ САГИТОВ ОшМПУда

Бүгүн М.Акмулла атындагы Башкыр мамлекеттик педагогикалык университетинин ректору Салават Сагитов иш сапары менен Ош мамлекеттик педагогикалык университетине келди.

Иш сапардын алкагында Салават Сагитов, Ош шаарындагы Орус үйүнүн жетекчиси Авраам Дмитрий Николаевич, КӨАЭУнун ректору Абдилбает Мамасыдыков, ОшМУнун ректору Кудайберди Кожобеков жана ОшМПУнун ректору Бекмурза Зулуев баштаган жамаат борбордук аянтка барып, Улуу Жеңиштин 80 жылдыгынын урматына өчпөс отко гүл коюп, согуштун ардагерлерин эскеришти.

Андан соң окуу жайдын табият таануу жана география факультетинин окутуучулары жана студенттерине конок-лекция уюштурулуп, мында профессор Салават Сагитов катышуучуларга лекция окуду. Лектор Орусиянын географиялык коомунун төрагасы иретинде окуу жайга Башкортостан жаратылышынын кооз табиятын чагылдырган картиналарды жана энцклопедиялык китептерди белекке тапшырды.

ОшМПУ менен БГПУ 2022-жылдын декабрь айынан бери кызматташат. Бул аралыкта эки окуу жай бир топ иш аракеттерди, долбоорлорду жүзөгө ашырып, өз ара байланышын бир топ бекемдей алды.