ОшМПУнун окутуучулары Өзбекстанда эл аралык билим берүү форумуна катышууда

Өзбекстандын Андижан мамлекеттик педагогикалык институтунда “International Vocational Education Forum – 2025” эл аралык форуму өтүп жатат.

Ага Ош мамлекеттик педагогикалык университетинен окуу жайдын мектеп мугалимдеринин квалификациясын жогорулатуу, ЖОЖго чейинки даярдоо жана үзгүлтүксүз билим берүү бөлүмүнүн башчысы; п.и.к., доцент Жыпаргүл Шербаева, гуманитардык факультетинин англис тили жана аны окутуунун усулу кафедрасынын башчысынын милдетин аткаруучу, магистр Махабат Осмонова жана электрондук башкаруу, мобилдүүлүк жана чет өлкөлүк студенттер менен иштешүү бөлүмүнүн башкы адиси Омарбек Мажитовдор да катышууда.

Иш-чаранын негизги максаты — билим берүү, санариптик трансформация жана экономика тармагында жаңы идеяларды талкуулоо, илимий кызматташтыкты чыңдоо жана инновациялык педагогика тармактарында иштеген изилдөөчүлөр менен адистердин башын бириктирүү болуп эсептелет.

Форумдун программасына ылайык пленардык отурумдар, илимий баяндамалар, мастер-класстар жана кызыктуу талкуулар орун алып, катышуучулар дүйнөлүк тажрыйбадагы билим берүүнү өнүктүрүү маселелерине токтолуу менен биргелешкен демилгелерди иштеп чыгышууда.

Бул маанилүү саамалык ОшМПУнун окутуучуларына дүйнөлүк билим берүү мейкиндигинде тажрыйба топтоого, жаңы долбоорлорду талкуулоого жана кесиптик байланыштарды чыңдоого кеңири мүмкүнчүлүк берүүдө.

Белгилей кетсек, аталган иш-чара Германиянын DAAD эл аралык уюмунун колдоосу менен, Дрезден жана Лейпциг университеттери менен биргеликте уюштурулуп, 2025-жылдын 29-сентябрынан 3-октябрына чейин уланат.