ЭСЕПКАНА
Университеттин бухгалтерия бөлүмү – каржылык башкаруунун борбордук звеносу болуп, окуу жайдын бардык киреше-чыгаша агымын так эсепке алуу жана каржылык тартипти камсыз кылуу милдетин аткарат. Бул бөлүм билим берүү процессинин үзгүлтүксүз жүрүшүнө түздөн-түз таасир этүү менен бирге, университеттин өнүгүү стратегиясынын негизги таянычы болуп саналат. Учурда бухгалтерия жана экономдоо-пландоо бөлүмүн экономика илимдеринин кандидаты, доцент Абылов Рысбек Абдикаримович жетектейт.
Бухгалтерия бөлүмүнүн ишмердигине кызматкерлердин айлык акысын жана студенттик стипендияларды өз убагында төлөө, чарбалык чыгымдарды жана материалдык каражаттарды эсепке алуу, каржылык отчетторду даярдоо жана тиешелүү мамлекеттик органдарга тапшыруу кирет. Университеттин атайын эсеби да ушул бөлүмдүн көзөмөлүндө болуп, анын каражаттары максаттуу жана эффективдүү пайдаланылат. Натыйжада акыркы жылдары университеттин материалдык-техникалык базасы бир кыйла чыңдалып, жаңы жабдуулар, лабораториялык шаймандар жана заманбап окуу каражаттары алынып келди.
Бухгалтериянын курамындагы экономдоо жана пландоо бөлүмү финансылык ресурстарды туура пайдалануу, үнөмдүүлүккө жетишүү жана келечектеги каржылык багыттарды аныктоо боюнча иш жүргүзөт. Бул бөлүм ар жылдык бюджетти пландаштырып, анын аткарылышын көзөмөлдөйт жана университеттин чыгымдары менен кирешелеринин тең салмактуулугун камсыз кылат. Экономикалык эсептөөлөрдүн негизинде каржылык агымдарды туура багыттоо университеттин туруктуулугун арттырууга өбөлгө болууда.
Акыркы жылдары бухгалтерия жана экономдоо-пландоо бөлүмүнүн ишмердигинин натыйжасында университеттин жалпы бюджети кыйла жогорулады. Бул өз кезегинде кызматкерлердин айлык акы фондунун өсүшүнө, социалдык кепилдиктердин кеңейишине жана билим берүү процессинин сапатын жогорулатууга мүмкүндүк түздү. Бүгүнкү күндө университет кызматкерлеринин эмгегин татыктуу баалоо менен катар, студенттер үчүн ыңгайлуу шарт түзүүгө жана окуу жайдын инфраструктурасын өнүктүрүүгө багытталган ири иштер аткарылууда.